ပအိုဝ်း ရိုးရာအစဉ်အလာများနဲ့ အမျိုးသားလက္ခဏာကို ထိန်းသိမ်းနိုင်။
အမျိုးသားလက္ခဏာကို မပပျောက်အောင် ထိန်းသိမ်းကာကွယ်မယ်ဆိုရင် ပထမဦးဆုံး ပအိုဝ်းများ နေထိုင်ရာဒေသတွေမှာ ပအိုဝ်းများနေ့စဉ် ဘ၀တွေကို ထိတွေ့၊ အကျွမ်းဝင်ရှိစေမယ့် ပအိုဝ်း ယဉ်ကျေးမှုနှင့်ဆိုင်ရာ ပွဲတွေ၊ ရိုးရာအထိမ်းအမှတ်ပွဲတွေ၊ အမျိုးသားနေ့တွေကို နှစ်စဉ်ကျင်းပ လုပ်ပေးနိုင်ပါတယ်။ ပအိုဝ်း ကိုယ်ပိုင်ယဉ်ကျေးမှု၊ ဓလေ့ထုံးထမ်း နှင့် ရိုးရာပွဲတွေ၊ ဘိုးဘွား အစဉ်အလာ၊ အလေ့အထတွေနဲ့ မဝေးကွားသွားအောင် လုပ်ပေးနိုင်ရင် မိမိတို့ရဲ့ ပအိုဝ်းတိုင်းရင်း သားလက္ခဏာကို ထိန်းသိမ်းကာကွယ်ရာ ရောက်ပါတယ်။
ပအိုဝ်း ဘာသာစကား နှင့် စာပေ မပပျောက်ဖို့အတွက် တရားဝင်ဖြစ်စေ၊ တရားမ၀င်ဖြစ်စေ တက်နိုင်သည့်ဘက်မှ သင်ကြားပေးနိုင်ပါတယ်။ ပအိုဝ်းဒေသရှိ အစိုးရ ကျောင်းတွေမှာ တရားဝင် သင်ကြားခွင့်ပြုရင်လည်း ပိုပြီး ထိရောက် ကောင်းမွန်ပါတယ်။
ပအိုဝ်းတိုင်းရင်းသားမဆို ဒေသကွဲ၊ ဘာသာကွဲ၊ စကားသံလေယူလေသိမ်းကွဲ၊ လူတန်းစား ကွဲပြာ သည့်ဖြစ်ပါစေ ပအိုဝ်းများနဲ့ဆိုင်တဲ့ အခမ်းအနားတွေ၊ ပွဲတွေ၊ နေ့တွေမှာ ပအိုဝ်းတိုင်းရင်းသားများ အားလုံး ပါဝင်ပူးပေါင်း၊ လုပ်ဆောင်လာအောင် ၀ိုင်းဝန်း ဆွဲခေါ်သွားရပါမယ်။
လူငယ်များအတွက် ပအိုဝ်းနှင့်ဆိုင်တဲ့ သမိုင်းစာအုပ်တွေ၊ တော်လှန်ရေးသမိုင်းတွေ၊ ယဉ်ကျေးမှု၊ ဘာသာရေး၊ လူမှုရေးသင်တန်းတွေ၊ ရိုးရာယဉ်ကျေးမှုဆိုင်ရာ ဘိုးဘွား အမွေအနှစ် ပြခန်းတွေကို ပအိုဝ်းတွေ နေထိုင်ရာအရပ်ဒေသတွေမှာ ဖွင့်လှစ်ပေးနိုင်ခြင်းဖြင့်လည်း မျိုးချစ်စိတ်၊ ရိုးရာမြတ်နိုး ထိန်းသိမ်းချင်စိတ်၊ မိမိအမျိုး ထိန်းသိမ်းစောင့်ရှောက်ချင်စိတ်များ ဖြစ်လာစေနိုင်ပါတယ်။
ဒါကြောင့် ပအိုဝ်းတိုင်းရင်းသား လက္ခဏာ မပပျောက်အောင်၊ အခြားလူမျိုးများ ၀ါးမြိုသွားမှု မခံရအောင်၊ သို့မဟုတ် သီးသန့်လူမျိုးတစ်မျိုး ဖြစ်နေတာကို အခြားလူမျိုးများ၏ မျိုးနွယ်ခွဲဟု ထင်မှားမခံရအောင် မိမိတို့ ပအိုဝ်းတိုင်းရင်းသားများဆိုင်ရာ ရိုးရာ အစဉ်အလာတွေကို တိုးတက် ထွန်းကားလာအောင် အခြေခံအားဖြင့် လုပ်ဆောင်ဖို့ လိုပါတယ်။
No comments:
Post a Comment