ဘာသာခြား သူရဿတီ...

သူရဿတီမယ်တော်ဆိုတာ ကျွန်ုပ် ငယ်ငယ်ကတည်းက ရင်းနှီးဖူးသားပါ။ ရင်းနှီးခဲ့ရတဲ့ အကြောင်းကတော့ ကျွန်ုပ်မယ်တော်ကြီး ကိုယ်တိုင် နေ့စဉ် ဘုရားရှိခိုးတိုင်း သူရဿတီဂါထာကို ရွတ်ဖတ်ပူဇော်နေတာကိုး။

အစစ အရာရာ အောင်မြင်စေဖို့အတွက် မယ်တော်ကြီးက ကျွန်ုပ်ကို အဲဒီဂါထာ အလွတ်ကျက်ခိုင်းပြီး အမြဲတမ်း ရွတ်ဆိုခိုင်းခဲ့တာလေ။ ကျောင်းစာမေးပွဲ ဖြေဆိုခါနီး အချိန်ဆိုရင် စာမေးပွဲ ဖြေနိုင်ဖို့ အတွက် အဲဒီ ဂါထာကို ရွတ်ဖတ်လိုက်ရတာ အမောပဲ။ ပြီးတော့ သူရဿတီက ပိဋကတ်သုံးပုံကို ထိန်းသိမ်းစောင့်ရှောက်နေရတာ ဆိုပဲ။
ငယ်ငယ်တုန်းကတော့ ဘာသိမှာတုန်း။ မိဘတွေက ခိုင်းလို့သာ သူရဿတီဂါထာ ရွတ်ဆို၊ ရှိခိုးဦးတိုက် လုပ်ခဲ့ရတာ။ စဉ်းစားတတ်တဲ့ အရွယ်ရောက်လာတော့

ဗုဒ္ဓဘာသာကို သေသေချာချာ လေ့လာစမ်းစစ်ကြည့်တဲ့ အခါမှာ သူရဿတီဟာ ဗုဒ္ဓဘာသာ မဟုတ်ဘဲ ဘာသာခြား ဖြစ်နေတာကို တွေ့လိုက်ရတော့တယ်။ အဲဒီတော့ ကျွန်ုပ်မှာ အတွေးတွေ စီကုံးလာရပြီပေါ့။

ဘာသာခြား သူရဿတီဟာ ဘယ်လိုလုပ်ပြီး ဗုဒ္ဓဘာသာထဲကို ၀င်ရောက် နေရာယူနေရတာလဲ?

အိန္ဒိယနိုင်ငံက စခဲ့တာပါပဲ။ အိန္ဒိယနိုင်ငံ အနောက်မြောက်ပိုင်း ပန်ဂျပ် (Panjub) ပြည်နယ်မှာ ရှိတဲ့ သရသွတီမြစ်ကို အမှီပြုပြီး မြစ်စောင့်နတ်ကို ကိုးကွယ်ရင်းက ဖြစ်ပေါ်လာခဲ့တယ်။ သူရဿတီ အမည်ကတော့ မြန်မာအသံထွက်နဲ့ ရေးထားတာပေါ့။ မူရင်းကတော့ သရသွတီ ပဲလေ။ ဟိန္ဒူဗြဟ္မဏ၀ါဒီတွေက အမျိုးအမျိုးချဲ့ထွင်ရင်းနဲ့ သူရဿတီလည်း ပုံစံတွေ အမျိုးမျိုး ပြောင်းလာခဲ့ရတယ်။ ဟိန္ဒူဘာသာမှာ ဝေဒကျမ်း လေးခုရှိတယ်။ အဲဒါတွေကတော့ ရိတ်ဝေဒ (Rig Veda), ယဇုဝေဒ (Yajwr Veda), သာမဝေဒ (Sama Veda), အာထဗ္ဗဏဝေဒ (Atharve Veda) တို့ပါပဲ။

သူရဿတီကိုတော့ ရိတ်ဝေဒ (Rig Veda) အထဲမှာ ပါနေတယ်။ သမိုင်းပညာရှင်တွေ ကတော့ ဘီစီ နှစ်ထောင်လောက်က အဲဒီ ဝေဒကျမ်း စပေါ်ခဲ့တယ်လို့ ခန့်မှန်း ပြောဆိုကြတယ်။ အဲဒီ ဝေဒကျမ်းတွေက ဗေဒင် သုံးပုံကို ပိဋကတ် သုံးပုံ အဖြစ် အမည်ပြောင်းလိုက်ပြီး ထေရ၀ါဒ ဗုဒ္ဓသာသနာထဲကို ၀င်ရောက် လာခဲ့တယ်။ ပိဋကတ်သုံးပုံကို စောင့်ရှောက်တဲ့ သူရဿတီ ဖြစ်သွားတယ်လေ။

အမှန်တကယ်တော့ ပိဋကတ်သုံးပုံကို စောင့်ရှောက်နေတဲ့ ပုဂ္ဂိုလ်တွေဟာ ရဟန်းသံဃာတွေပါပဲ။ သူရဿတီမှ မဟုတ်တာ။ ဘုန်းကြီးကျောင်း စာသင်တိုက်တွေမှာ ဆိုရင် ကိုရင်လေးတွေက စပြီး ဆရာတော်ကြီးတွေ အထိ ပိဋကတ် စာပေးတွေကို ဖတ်မှတ်၊ ရေးမှတ်နေကြရတာ။ 

ရဟန်းသံဃာတွေသာ မရှိတော့ရင် ပိဋကတ်တော်တွေကိုလည်း ဆက်ပြီး မထိန်းသိမ်းနိုင်တော့ပါဘူး။ သူရဿတီကို ကိုးကွယ်နေရုံနဲ့ ပိဋကတ်တော်တွေ ဆက်လက်ရှိနေမှာမှ မဟုတ်တာ။ ရဟန်းသံဃာတွေကို ကိုးကွယ်နေတာမှ ပိဋကတ်တော်တွေကို ဆက်လက် ထိန်းသိမ်းနေတာနဲ့ အတူတူပါပဲ။

အိန္ဒိယမှာတော့ သူရဿတီနတ်ကို ပညာရေးစောင့်ရှောက်တဲ့ နတ်ဘုရားမ၊ အနုပညာကို ဖန်တီးတဲ့ နတ်ဘုရားမ ဆိုပြီး အမျိုးအမျိုး ခေါ်တွင်ကြတယ်။ အိန္ဒိယက သူရဿတီ နတ်ကတော့ လက် လေးချောင်းရှိတယ်လေ။ မြန်မာပြည်ကို အဲဒီ နတ်ရောက်လာတော့ လက်က နှစ်ချောင်းပဲ ပါတော့တယ်။ လက်နှစ်ချောင်း ဘယ်ရောက်သွားလဲ ဆိုတောကိုတော့ ကျွန်ုပ်လည်း သုတေသန မပြုတတ်။

ပြီးတော့ မြန်မာပြည်မှာ ရှိတဲ့ သူရဿတီက ဟင်္သာ စီးတယ်။ အိန္ဒိယက သူရဿတီက ငန်း ကို စီးထားတယ်။ စီးတော်ငန်းကနေ စီးတော် ဟင်္သာ ဘယ်လို ဖြစ်သွားလဲ ဆိုတာလည်း ကျွန်ုပ် မတွေးတတ်ပါ။

အဲဒါနဲ့ အိန္ဒိယ၊ ဒေလီတက္ကသိုလ်က အန္ဒိယလူမျိုး လူငယ်ကျောင်းသားလေးတွေက တစ်နေ့မှာ ကျွန်ုပ်ကို လာပြီးတော့ ခေါ်တယ်။ ပညာရေး ကောင်းစေတဲ့ သူရဿတီကို ရှိခိုးဖို့တဲ့လေ။

ကျွန်ုပ်က ပြန်ပြောလိုက်ပါတယ်။ 

ပညာရေး ကောင်းချင်ရင် ကုသိုလ်ကောင်းမှု များများ လုပ်ရင်း စာကြိုးစားပေါ့ လို့။ 

သူတို့ကတော့ သူရဿတီ နတ်ဘုရားမ ကို ကိုးကွယ်ပူဇော်တဲ့ နေ့တစ်နေ့ ရှိတယ်။ အဲဒီနေ့မှာဆိုရင် ကျောင်းသား လူငယ်တွေ အားလုံး သူရဿတီ ရုပ်တုကို ခမ်းခမ်းနားနား ပူဇော် ရှိခိုးကြတယ်။

မြန်မာနိုင်ငံက တချို့ ဘုရားစေတီတွေရဲ့ ရင်ပြင်တော်တွေမှာ သူရဿတီမယ်တော် ရုပ်ထုကို တည်ထားကိုးကွယ်နေကြတာ အခုထိတိုင်အောင် ရှိနေတုန်းပါပဲ။ စာပေဗဟုသုတ အသိဉာဏ် နည်းပါးနေသေးတဲ့ ပုဂ္ဂိုလ်တွေကျတော့ သူရဿတီကို ယုံကြည်နေကြတုန်းပါပဲ။ ဒါတွေဟာ မဖြစ်သင့်တော့ပါဘူး။

မိမိ ဗုဒ္ဓဘာသာက မဟုတ်ဘဲနဲ့ ဘာသာခြားက လာတဲ့ သူရဿတီ နတ်ဆိုတာ သိသွားပြီ ဆိုရင်တော့ အမှားတွေကို ပြုပြင်သင့်ပြီလေ။ ဘုရားကျောင်းဆောင်ရဲ့ နေရာမှာ အမျိုးသမီး သူရဿတီ မယ်တော်ကို ဘုရားနဲ့အတူတူ ယှဉ်တွဲ ပူဇော်နေတာကိုက ဗုဒ္ဓဘာသာဝင်တွေဟာ ကိုယ့်ဗုဒ္ဓဘာသာအကြောင်းကို အလေးအနက် မသိကြသေးလို့ပဲ။ 

ကျွန်ုပ်မယ်တော်ကြီး အိမ်က သူရဿတီကတော့ နတ္ထိဖြစ်သွားပြီ။

ကဲ ဒီလောက်ဆိုရင် မိမိတို့ အိမ်မှာ ရှိတဲ့ ဘာသာခြားမှ လာတဲ့ သူရဿတီကို ဘာသာခြားဆီကိုသာ ပြန်ပို့လိုက်ကြပါတော့....