အဲလိုနံပါတ်စဉ်တွေထိုးပြီး သရုပ်ခွဲရှင်းပြထားတဲ့စာဖတ်ရတာ ပညာရပ်ဆန်တယ်။ မှတ်ရသားရ လွယ်ကူတယ်။ ဗဟုသုတဖြစ် ဖတ်တဲ့အခါ ခွဲခြားစိတ်ဖြာပြီးသားတွေ တွေ့ရတော့ အများကြီး အထောက်အကူဖြစ်တယ်။ သင်္ချာပညာကို လက်နက်ကိရိယာ တစ်ခုသဖွယ် ကောင်းကောင်းကြီး အသုံးချထားတယ်လို့ ပြောရမယ်ထင်တယ်။
ဒီနေ့လက်ရှိ ကြုံနေရတဲ့ ဘလော့လော့က အတွေ့အကြုံအရ ဘာသာခြားတို့ရဲ့ စာပေတွေလည်း တော်တော်ဖတ်ဖြစ်တယ်။ ဘာသာခြားစာပေ ဖတ်တယ်ဆိုတာ သိပ်တော့မလွယ်လှဘူး။ မွေးရာပါ သဒ္ဓါတရားက မရှိ၊ လူပုဂ္ဂုလ်တွေကိုလည်းမသိ၊ ဝေါဟာရတွေက စိမ်းနဲ့ ဆိုတော့ နားမလည်တာတွေ တော်တော်များတယ်။ တခါတခါ စာဖတ်ရင်း စိတ်က တခြားရောက်သွားတော့ ဘာမှကို သဘောမပေါက်လိုက်ဖူး ၂-ခေါက်၊ ၃-ခေါက် ပြန်ဖတ်ရတယ်။ ကျွန်တော်တို့ရဲ့ ဘုရားရှင် ဂေါတမ ဗုဒ္ဓကို အခြားပုဂ္ဂိုလ် အချို့နဲ့ နှိုင်းယှဉ်ပြီး တန်းတူဖော်ပြ ခံရတာ မခံနိုင်လွန်းလို့ ကျမ်းဟောင်းတွေမှာများ ဒီတိုင်းပါနေလို့လား ဆိုပြီး ကျမ်းကိုးရှာရတာပါ။ စိတ်ဓာတ်လေးက နည်းနည်းဆောင်နေတော့ သဒ္ဓါမရှိပေမဲ့ ဝီရိယ စိုက်လိုက်တဲ့ အခါ ဝီရိယ အကျိုးတော့ ခံစားရပါတယ်။
သူတို့စာတွေဖတ်တော့ သတိထားမိတာ က သရုပ်ခွဲပြထားတာဆိုရင် လုံးဝ မရှိသလောက်ပါပဲ။ ကဏ္ဍတိုင် ကဏ္ဍတိုင်းမှာ ဝတ္ထုတွေလို စာတွေကို ပြင်လိုက်ကြီးတွေ ရေးထားတယ်။ မှတ်သားစရာ အချက်ဆိုရင် ဝါကျတစ်ကြောင်းချင်းစီအတွက် စိတ်ထဲက အမှတ်စဉ်ထိုးပြီး မှတ်ယူရတယ်။ ကိန်းဂဏန်းဆိုရင်လည်း တစ်ဆူတည်းသော ဘုရားရှင်အကြောင်း ပြောတဲ့ အပိုဒ်ရောက်မှ (၁) တစ်လုံးကို သုံးတာတွေ့ရတယ်။ ဂရုတစိုက်ဖတ်ကြည့်တော့ တတ်ကြွအောင်တွေ၊ ပျော်အောင်တွေ၊ ကြည်နူးအောင်တွေစသဖြင့် ရသအမျိုးမျိုးတော့ ပေးပုံကျပါတယ်။ ကဗျာတွေ၊ အလင်္ကာတွေ ဖတ်နေရသလိုထင်လာမိတယ်။ ပညာရပ်မဆန်ဘူး၊ သုတစာပေနဲ့ မတူဘူး-လို့ ဝေဖန်ရမယ်ထင်တယ်။
ဗုဒ္ဓဘာသာစာပေမှာလည်း ဝတ္ထုကြောင်း အသားပေးတဲ့ သုတ္တန်တွေတော့ ရှိပါတယ်။ ဒါပေမဲ့ အဲဒီထဲတွေမှာလည်း ဓမ္မကိုဟောတဲ့အခါ သရုပ်ခွဲပြမှုတွေက ပါတတ်စမြဲပါပဲ။
ဒီစာရေးရင် ဆရာမောင်စွမ်းရည်ရဲ့ စာပေဟောပြောပွဲက မဗေဒါ သီချင်းလေးအကြောင်း သတိရမိတယ်။ သီချင်းလေးက တော်တော် နားထောင်လို့ကောင်းတယ်။ နားထောင်ကောင်းလို့ ကြိုက်တယ်။ ရင်ထဲမှာ ရသ တစ်ခုခုတော့ ခံစားရသလိုပဲ။ ကျွန်တော်ကပဲ အနုပညာ ခံစားတတ်မှု အားနည်းလို့လားတော့ မသိဘူး။ တန်ဖိုးရှိတဲ့ အဆုံးအမတွေတော့ ဘာမှ မယ်မယ်ရရ မရလိုက်ပါဘူး။ ဆရာမောင်စွမ်းရည် ပြောတဲ့ စာပေဟောပြောပွဲ နားထောင်လိုက်တော့မှ ဗေဒါပင်လေးခမျာ ရေစီးအတိုင်းလိုက်ပါရင်း မြင့်လိုက်နိမ့်လိုက်ဖြစ်တာတွေ၊ ဘဲအုပ်ရဲ့ အယက်အကန် ခံရတာတွေ ဘယ်လိုခံရပေမဲ့ နောက်ဆုံးမှာတော့ ပန်းပန်လျက် ရှိနေတာတွေ အကုန်လုံး ချဲပြီးဉာဏ်မီသမျှ လိုက်ကြည့်တော့ မင်္ဂလာတရားတော် အဆုံးအမထဲက “ဖုဋ္ဌဿ လောကဓမ္မေဟိ၊ စိတ္တံ ယဿ နကမ္ပတိ။ လောကဓံကြုံ မဖြုံတမ်းပေါ့ မတုန်စမ်းနဲ့ စိတ်ခိုင်စေ။” ဆိုတဲ့ အဆုံးအမကို ကဗျာဆရာက ပေးချင်တာပဲ ဆိုတာ သိလိုက်ရတယ်။ တကယ်တော့လည်း ဆရာမောင်စွမ်းရည် ကျေးဇူးနဲ့ တည့်တည့်ပြောမှ ရေးရေးမြင်တဲ့ သဘောပါ။ အနုပညာ ခံစာမှုမှာတော့ ကျွန်တော်က အဲလောက်တော်တာ။
ခံယူသူ အချင်းချင်းတော့လည်း တူမှာ မဟုတ်ပါဘူး။ ကျွန်တော်လို လူအတွက်ကတော့ အနုပညာကို အသုံးပြုပြီးပေးတဲ့ မက်ဆေ့ခ်ျထက် သင်္ချာကိန်းဂဏန်းတွေကို အသုံးပြုပြီး သရုပ်ခွဲပြတဲ့ အချက်အလက်တွေက ပိုမိုထိရောက်မှု ရှိတယ်လို့ထင်ပါတယ်။
အခုဆက်ပြီး သုတ္တန်ပိဋကတ်၊ ပါထိကဝဂ်ပါဠိတော်၊ ၈-သိင်္ဂါလသုတ် လာ မိဆွေတု ၄-မျိုးတို့အကြောင်း စနစ်တကျ သရုပ်ခွဲပြသထားပုံကို ကူးယူဖော်ပြပေးလိုက်ပါတယ်။
မိဆွေတု
၂၅၄။ သူကြွယ်သား မိတ်ဆွေစစ် မဟုတ်သော ဤမိတ်ဆွေတု လေးယောက်တို့ကို သိအပ်ကုန်၏။
၁) စင်စစ် ယူသာ ယူတတ်သော မိတ်ဆွေစစ် မဟုတ်သော မိတ်ဆွေတုကို သိအပ်၏၊
၂) နှုတ်မျှ ဖြင့်သာလျှင် ပေးတတ်သော မိတ်ဆွေစစ် မဟုတ်သော မိတ်ဆွေတုကို သိအပ်၏။
၃) အကြိုက်ကိုလိုက်၍ ပြောဆိုတတ်သော မိတ်ဆွေစစ် မဟုတ်သော မိတ်ဆွေတုကို သိအပ်၏
၎) ပျက်စီးကြောင်း၌ အပေါင်းအဖော်ဖြစ်သော မိတ်ဆွေစစ်မုတ်သော မိတ်ဆွေတုကို သိအပ်၏။ (သုတ္တန်ပိဋကတ်၊ ပါထိကဝဂ်ပါဠိတော်၊ ၈-သိင်္ဂါလသုတ်၊ မိတ်ဆွေတု)
ဆက်ပြီး အထက်ဖော်ပြပါ မိတ်ဆွေ ၄-မျိုးတို့ရဲ့ မိတ်ဆွေတုဖြစ်ကြောင်း သိအပ်သော အကြောင်းများကို ၄-ချက်စီ ဖော်ပြပြီး အကျယ်တဝင့် လာရှိပါတယ်။ ပိဋကတ်တော် မြန်မာပြန်လာ အပြည့်အစုံကို မဖော်ပြတော့ပါ။ အချက်အလက်များကိုသာ ဖော်ပြသွားပါတော့မည်။ နားလည်ရခက်မည်ထင်သော နေရာတွင် ဥပမာလေးများ ထည့်၍ ပြောသွားပါမည်။
၁) ယူသာ ယူတတ်သောမိတ်ဆွေတုကို သိအပ်သော အချက် ၄-ချက်
- ယူသာ ယူတတ်ခြင်း၊
- နည်းသောဥစ္စကိုပေး၍ များစွားသောဥစ္စကို အလိုရှိခြင်း၊
- မိမိကိုယ်တိုင်ဘေးတွေ့ခါမှ သူတပါးကိစ္စကို ကူညီတတ်ခြင်း၊
- မိမိအတွက် အကျိုးကျေးဇူးကို ရလိုမှ ဆည်းကပ်တတ်ခြင်း။
၂) နှုတ်မျှ ဖြင့်သာလျှင် ပေးတတ်သော မိတ်ဆွေတုကို သိအပ်သော အချက် ၄-ချက်
- လွန်ပြီးသော ပစ္စည်းဖြင့် ချီးမြှောက်တတ်ခြင်း၊ (မနေ့ကမလာလို့ မနေ့ကလာရင်ကူညီနိုင်တာပေါ့ စသည် စကားမျိုးဖြင့်)
- မဖြစ်သေးသော အရာဖြင့် ချီးမြှောက်တတ်ခြင်း (သီနှံပေါ်ချိန်လောက်မှ ကူညီနိုင်မယ် စသည်စကားမျိုးဖြင့်)
- အချည်းအနှီးလောကွတ်မျှဖြင့် ချီးမြှောက်ခြင်း၊ (လာမစားနိုင်တာ သေခြာလောက်မှ ထမင်းစား အတင်းဖိတ်ခြင်းမျိုး)
- ဖြစ်ဆဲကိစ္စတို့၌ ပျက်စီးခြင်းကို ပြတတ်ခြင်း (အကူအညီလာတောင်းသူကို မိမိဒုက္ခအကြောင်း ရှာ၍ညည်းညူပြတတ်ခြင်း)
၃) အကြိုက်ကိုလိုက်၍ ပြောဆိုတတ်သော မိတ်ဆွေတုကို သိအပ်သော အချက် ၄-ချက်
- မကောင်းမှုကိုလည်း ခွင့်ပြုခြင်း၊
- ကောင်းမှုကိုလည်း ခွင့်ပြုခြင်း၊
- ရှေ့တွင်ချီးမွှမ်းစကား ဆိုခြင်း၊
- ကွယ်ရာတွင် ကဲ့ရဲ့စကားဆိုခြင်း၊
၎) ပျက်စီးကြောင်း၌ အပေါင်းအဖော်ဖြစ်သော မိတ်ဆွေတုကို သိအပ်သော အချက် ၄-ချက်
- မူရစ်ဆေးဝါး သုံးစွဲရာ၌ အပေါင်းအဖော်ဖြစ်ခြင်း၊
- အချိန်အခါမဟုတ် ခရီးသွားလာရာ၌ အဖော်ဖြစ်ခြင်း၊
- ပွဲလမ်းသဘင် ကြည့်ရှုနားထောင်ခြင်း၌ အဖော်ဖြစ်ခြင်း၊
- လောင်းကစားမှု၌ အဖော်ဖြစ်ခြင်း
ဆက်လက်ပြီး မိတ်ဆွေကောင်း ၄-မျိုးအကြောင်းကိုလည်း သိအပ်သော အချက်များနှင့်တကွ ကျကျနန သရုပ်ခွဲပြပြီး ဟောကြားထားပါသေးသည်။ ပိဋကတ်တော် မြန်မာပြန်မှာ ဖတ်ပါ။
ဖော်ပြပါ အဆုံးအမကို ကြည့်ခြင်းအားဖြင့် ကောင်းသော စကားကိုသာ ဆိုတော်မူတတ်သော ဗုဒ္ဓ၏ တရားတော်များသည် သဘာဝ ဓမ္မများကိုသာ သေခြာစွာ သရုပ်ခွဲ ရှင်းလင်းဟောပြောထားသည် ဖြစ်၍ အချိန်ကာလလည်းမရွေး၊ နေရာဒေသလည်း မရွေး၊ လူမျိုးဘာသာ ပုဂ္ဂိုလ်အရာမှာလည်းမရွေး ယခုကျင့်သုံးလျှင် ယခု ကောင်းကျိုးပေးနိုင်သည် ဆိုခြင်းမှာ လက်တွေ့စမ်းသပ်ကြည့်သူ ဆိုလျှင် လက်မခံနိုင်စရာမရှိလောက်တော့ပါ။
ဘလော့ဂ်ဖတ်သူ ပရိတ်သတ်အားလုံး မိတ်ဆွေတုများကြောင့် ကျရောက်ရသော ဆိုးကျိုးအမျိုးမျိုးမှ ကင်းဝေးကြပါစေ။ မိမိကိုယ်တိုင်လည်း မိမိချစ်ခင် ရသော ဆွေမျိုးမိတ်သဂဟ၊ ညီအစ်ကို မောင်နှမများအတွက် မိတ်ဆွေတု ဖြစ်ရခြင်းမှ ကင်းကြပါစေ။
No comments:
Post a Comment