ဇာတိဒုက္ခ
အမိဝမ်းခေါင်း၌ ရှေးဦးစွာ ရုပ်သစ် နာမ်သစ်တရားတွေ ဖြစ်ပေါ်မှုကို ဇာတိ-ဟုဆိုရသည်။ ရုပ်တရားတို့ ရှေးဦးစွာ ဖြစ်ပေါ်မှုကို ရုပ်၏ ဇာတိ၊ နာမ်တရားတို့ ရှေးဦးစွာ ဖြစ်ပေါ်မှုကို နာမ်၏ ဇာတိ၊ ဤသို့ ဇာတိ နှစ်မျိုးရှိသည်။ ထိုရုပ်သစ် နာမ်သစ် အစရှေး...ဦးစွာ ဖြစ်ခြင်းဟူသော ပဋိသန္ဓေတည်နေရသူမှာ အမိဝမ်းခေါင်း၌ အမိ၏ အစာဟောင်းအိမ်၌ ထိုင်၍ အစာသစ်အိမ်ကို ခေါင်းဖြင့် ရွက်လျက်-
* စာဟောင်း စာသစ်၊ အောက်ထက်ဝန်းရံ- ဆိုသည့်အရ နေရပေသည်။
ကြပဒုမ္မာ ကြာပုဏ္ဍရိက် စသော နှစ်သက်ဖွယ်ကောင်းသော အနံ့ရှိသော သန့်ရှင်းသောဌာန၌ ဖြစ်ရသည် မဟုတ်၊ စင်စစ် များစွာသော အညစ်အကြေးတို့ဖြင့်၎င်း၊ မကောင်းသော အနံ့တို့ဖြင့်၎င်း၊ ပြည့်သောသူငယ်အိမ်၌ အမိ၏ ကိုယ်ဝန်ဆောင် သွေးကို၎င်း၊ မိဘ နှစ်ဦးတို့၏ အညစ်အကြေး သုက်သွေးကို၎င်း မှီ၍ အလွန်ကျဉ်းမြောင်း ကျပ်တည်းစွာသော အရပ်၌ ငါးပုပ် အမဲပုပ်တို့ကို မှီ၍ဖြစ်သော ပိုးလောက်ကဲ့သို့-
* ပုပ်နှံညှီလောင်း၊ ကျဉ်းမြောင်းမဲမိုက်၊ မိဝမ်းတိုက်ဝယ်၊ ဘင်၌လောက်လို-ဆိုသည့်အရ ဖြစ်ရပေသည်။
အမိကျောဘက်ကို မျက်နှာမူ၍ ဒူးနှစ်လုံးတို့၏အကြား၌ ခေါင်းကိုထားလျက် မေးအောက်၌ လက်နှစ်ဘက်ဆုပ်၍ သစ်ငုတ်တိုပေါ်၌ မျောက်အိုသည် ကုပ်ကုပ်လေး နေသလို-
* ကျောကိုဝမ်းပြု၊ ဒူးနှစ်ခုကြား၊ ဦးခေါင်းထားလျက်၊ မေးဖျားလက်ဆုပ်၊ သစ်ငုတ်တိုမှာ၊ မျောက်အိုကုပ်သည့်နှယ်-ဆိုသည့်အရ နေရပေသည်။
ထိုနေရာ၌ ကိုးလ ဆယ်လ လေးတန်လေးဘက်ကို မလှုပ်မလှဲ့ ကွေးလျက်သာ အလွန်ဆင်းရဲစွာ နေရသောကြောင့် အမိ၏ ၀မ်းခေါင်းကို ဒရီမုခဇာတ်-အဋ္ဌကထာ၌ သာယာမှု ကင်းသော ငရဲဟူ၍၄င်း၊ လေးတန်လေးဘက် ကွေးလျက်နေရသော စတုကုဋ္ဋိက ငရဲဟူ၍၄င်း ပြဆိုထားပါသည်။ အမိသည် လျင်စွာ သွားလာခြင်း၊ တိမ်းပါးချွတ်ချော်ခြင်း စသည်ဖြစ်သောအခါ သေသောက်ကြူး လက်တွင်းသို့ သက်ဆင်းရောက်၍နေသော ဆိတ်-သူငယ်ကဲ့သို့၎င်း၊ မြွေ-အလမ္ပာယ်ဆရာသည် မြွေကိုဖမ်း၍ အမျိုးမျိုး နှိပ်စက် ညှဉ်းပန်းခြင်း၊ အစာငတ်ခြင်း စသည်ကြောင့် အလမ္ပယ်ဆရာမိသော မြွေ၏ မချိမဆန့် ဖြစ်နေရသကဲ့သို့၎င်း-
* မလှုပ်မရှက်၊ သေသောက်လက်ဝယ်၊ ဆိတ်သူငယ်လို၊ အလမ္ပာယ်မိ၊ မြွေငယ်ချိသို့-ဆိုသည့်အရ ဖြစ်ရပါသည်။
အမိသည် စပ်သောအစာကို စားသောအခါ၌ လှံထိုး၍ ဆားပက်ခြင်းကို ခံရသူကဲ့သို့၎င်း၊ ပူသောအစာကို စားသောအခါ ဥဿဒ ငရဲငယ်၌ ခံရသကဲ့သို့၎င်း၊ အမိသည် အလွန်အေးသော အစာများကို စားမိသောအခါ၌ လောကန္တရိတ်ငရဲ၌ ခံနေရသူကဲ့သို့၎င်း၊ သေလုမတတ် ကိုယ်သား တဆတ်ဆတ်ဖြင့် ကြီးစွာသောဆင်းရဲကို -
* အမိ စပ်-ခါး၊ ပူ-အေး-စားလည်း၊ ကိုယ်သားဆတ်ဆတ်၊ သက်ပြတ်တစေ၊ ဆယ်လနေ၍-ဆိုသည့်အရ ခံစားရချေသည်။
ဤအဆိုများကိုထောက်ထား၍ မိခင်ဖြစ်သူများ ရှောင်ရှားမှုကို ပြုကြပါလေ။ ထို့နောက် ကမ္မဇလေ လှုပ်ရှားတိုက်ခတ်သဖြင့် စောက်ထိုးမိုးမျှော် ခြေကား-အထက်၊ ခေါင်းကား-အောက်သို့ လှည့်ရပြီးနောက် မဂ်ဝသို့ရောက်သောအခါ သေးငယ်သော သံကောက်ပေါက် (သော့ပေါက်) မှ ဆင်ပြောင်ကြီးကို ဆွဲထုတ်ရသကဲ့သို့၎င်း၊ သံဘောင်ကြီးဖြင့် အကြိတ်ခံရသကဲ့သို့၎င်း၊ ဆင်းရဲကြီးလှ၏။ ကောင်းစွာမမွေးဖွားနိုင်ပါလျှင် မိခင်ချမ်းသာ ပြီးရော, ကလေး ဘယ်လို ဖြစ်ဖြစ်-ဟူ၍ ဆိုကြသေး၏။ အမိဝမ်းတိုက်၌ လေမျှ မတိုက်ရသဖြင့် အလွန်နူးညံ့လှသော သူငယ်ကို ညှပ်ဖြင့် ဆွဲထုတ်ရသည်ကိုလည်း ကြားဖူး၏။ မည်မျှ ဆင်းရဲပါမည်နည်း။ အပြင်သို့ ရောက်သောအခါလည်း ကြမ်းတမ်းသော အ၀တ်-စသည်ဖြင့် ထိပါးကိုင်တွယ်မှုကြောင့် အပ်ဖြင့် အဆွခံရသကဲ့သို့ ဆင်းရဲလှ၏။
ကြီးပြန်သောအခါလည်း အိုရ, နာရ, သေရ စသည်ဖြင့် ဆင်းရဲကြီးစွာ တွေ့ကြရ ကြုံကြရပြန်၏။
* လေကမ္မဇ၊ ဦးဇောက်ချသား၊ မဂ်ဝသို့ရောက်၊ သံကောက်ပေါက်ဝယ်၊ ဆွဲမြှောက်ဆင်ပြောင်၊ သံဘောင်ကြိတ်ခြေ၊ ပုံနေရယိက၊ ပြင်သို့ကျလည်း၊ အပ်ဆွသည့်ဟန်၊ ကြီးပြန် ဒုက္ခ၊ ပြစ်များလှသည်၊ မူလဇာတိ မြစ်ရင်းတည်း။
( လင်္ကာ )
စာဟောင်းစာသစ်၊ အောက်ထက်ဝန်းရံ၊ ပုပ်နှံညှီလောင်း၊ ကျဉ်းမြောင်းမဲမိုက်၊ မိဝမ်းတိုက်ဝယ်၊ ဘင်၌လောက်လို၊ ကျောကိုဝမ်းပြု၊ ဒူးနှစ်ခုကြား၊ ဦးခေါင်းထားလျက်၊ မေးဖျားလက်ဆုပ်၊ သစ်ငုတ်တိုမှာ၊ မျောက်အိုကုပ်သည့်နှယ်၊ မလှုပ်မရှက်၊ သေသောက်လက်ဝယ်၊ ဆိတ်သူငယ်လို၊ အလမ္ပါယ်မိ၊ မြွေငယ်ချိသို့၊ အမိ စပ်း-ခါး၊ ပူ-အေး-စားလည်း၊ ကိုယ်သားဆတ်ဆတ်၊ သက်ပြတ်တစေ၊ ဆယ်လနေ၍၊ လေကမ္မဇ၊ ဦးဇောက်ချသား၊ မဂ်ဝသို့ရောက်၊ သံကောက်ပေါက်ဝယ်၊ ဆွဲမြှောက်ဆင်ပြောင်၊ သံဘောင်ကြိတ်ခြေ၊ ပုံနေရယိက၊ ပြင်သို့ကျလည်း၊ အပ်ဆွသည့်ဟန်၊ ကြီးပြန်ဒုက္ခ၊ ပြစ်များလှသည်၊ မူလဇာတိမြစ်ရင်းတည်း။
မှတ်ချက်။
ဇာတိ ပဋိသန္ဓေနေမှု ဆင်းရဲစစ် ဆင်းရဲမှန် ဒုက္ခသစ္စာတရားဖြင့် ဘ၀သစ်ကို ထူထောင်ကြပြီးလျှင် ချစ်သူတို့နှင့် အတူမနေရ ဒုက္ခသစ္စာ။ မုန်းသူတို့နှင့် အတူနေရ ဒုက္ခသစ္စာ။ လိုတာမရ ဒုက္ခသစ္စာ။ အိုရမှု ဒုက္ခသစ္စာ။ နာရမှု ဒုက္ခသစ္စာ။ သေရမှု ဆင်းရဲစစ် ဆင်းရဲမှန် ဒုက္ခသစ္စာဖြင့်ပင် တဘ၀နောက်ဆုံး နိဂုံးအုပ်ကြရလေသည်။
တဖန် ထိုကဲ့သို့ ဒုက္ခသစ္စာနှင့် တွေ့ကြရဦးမည်ဖြစ်သော ငရဲဟူသော အမိဝမ်းခေါင်း၌ ကိန်းအောင်းရမည်ကို အကြောက်ကြီး ကြောက်ကြလျက် သံဝေဂဉာဏ်သို့ရောက်၍ နိဗ္ဗာန်သို့ပေါက်အောင် သတိဆောင်ကာ သဒ္ဓါစေတနာ ရှေ့သွား ပုညတရားတို့ကို စွမ်းအားထုတ်၍ ပြုလုပ်နိုင်ကြပါစေကုန်သတည်း။
No comments:
Post a Comment