မေတ္တာဆိုတာ စိတ်ကောင်း၊ နှလုံးကောင်း
**************************
မေတ္တာဆိုတာကို ချစ်ခြင်း၊ နှစ်သက်၊ မြတ်နိုးခြင်းရယ်လို့ အလွယ်တကူ မှတ်ယူ တတ်ကြပါတယ်။ ဗုဒ္ဓရဲ့အဘိဓမ္မာနဲ့ လေ့လာရင် မေတ္တာဟာ အဒေါသ စေတသိတ် ဖြစ်ပါတယ်။ လောဘစေတသိတ်ရဲ့ ဆန့်ကျင်ဘက်ဟာ အလောဘ၊ မောဟစေတသိတ်ရဲ့ ဆန့်ကျင်ဘက်ဟာ အမောဟဆိုတာပါပဲ၊ အဒေါသ ဆိုတာ ဒေါသရဲ့ ဆန့်ကျင်ဘက် စေတသိတ်ပါပဲ။
လူတစ်ယောက်ဒေါသ ထွက်နေပြီဆိုရင် ဒီလူ စိတ်ဆိုးနေတယ်လို့ ပြောတတ်ကြပါတယ်။ ဒေါသစေတသိတ်ကို “စိတ်ဆိုး” ဆိုတဲ့ ဝေါဟာရနဲ့ ဖလှယ်ကြပါတယ်။ ဒါကြောင့် သူ့ရဲ့ဆန့်ကျင်ဘက် အဒေါသကိုတော့ “စိတ်ကောင်း၊နှလုံးကောင်း”လို့ ဝေါဟာရ ဖလှယ်ရမှာပါ။
စိတ်ကောင်း၊ နှလုံးကောင်း ထားနိုင်သူဟာ မေတ္တာပွားများနေသူမည်ပါတယ်။ စိတ်ကောင်း၊ နှလုံးကောင်း ရှိတဲ့ မိသားစုဟာ ပျော်ရွှင်ချမ်းမြေ့မှုကို ခံစားကြရမှာ အမှန်ဖြစ်ပါတယ်။ စိတ်ကောင်း၊ နှလုံးကောင်းရှိတဲ့ အကြီးအမှုးအုပ်ချုပ်တဲ့ဌာနတွေဟာ တိုးတက်ကြီးပွား အောင်မြင်နိုင်မှာ ဧကန်ဖြစ်ပါတယ်။
ဗုဒ္ဓဘုရားရှင်က စိတ်ကောင်း၊ နှလုံးကောင်း (မေတ္တာ) ရှိသူတွေ ရနိုင်တဲ့ အကျိုး ဆယ့်တစ်မျိုးရှိတယ်လို့ ဟောကြားထားပါတယ်။ အဲဒါတွေကတော့
၁။ အေးချမ်းစွာ အိပ်ပျော်နိုင်ခြင်း
၂။ အေးချမ်းစွာ နိုးထနိုင်ခြင်း
၃။ အိပ်မက်ဆိုးများ မမက်နိုင်ခြင်း
၎။ နတ်ကောင်း နတ်မြတ်များ စောင့်ရှောက်ခြင်း
၅။ လူသားတို့က လေးစားခင်မင်ကြခြင်း
၆။ နတ်ကောင်းများက ကြည်ညိုခြင်း
၇။ လက်နက်၊ အဆိပ်၊ မီး စသည့်တို့ မထိ၊ မသင့်နိုင်ခြင်း
၈။ မျက်နှာကြည်လင် အေးချမ်းခြင်း
၉။ စိတ်ဓါတ်ကြည်လင် အေးချမ်းခြင်း
၁၀။ မတွေမဝေ ဘ၀ကို စွန့်ခွါနိုင်ခြင်း
၁၁။ တမလွန်၌ ဈာန်ရသော် ဗြဟ္မာဘုံ၊ ဈာန်မရသော် သုဂတိဘုံသို့ရောက်ရခြင်း တို့ဖြစ်ပါသည်။
မေတ္တာ တရား ၊ စိတ်ကောင်း၊ နှလုံးကောင်း ကိုပျက်စေနိုင်တဲ့ အပျက်တရား (၂)ပါး ရှိပါတယ်။ အဲဒါတွေကတော့ တွယ်တာချစ် (တဏှာပေမ+ဂေဟဿတပေမ) နှင့် မုန်းတီးခြင်း (ဒေါသ) တို့ဖြစ်ပါတယ်။ ဒီအစွန်း (၂)ပါးက လွတ်အောင် သတိနဲ့ နေထိုင်နိုင်ပါမှ မေတ္တာ မပျက်မှာ ဖြစ်ပါတယ်။ ဒီအစွန်း(၂) ပါးက လွတ်အောင် သတိနဲ့ နေထိုင်နိုင်ပါမှ မေတ္တာမပျက်မှာ ဖြစ်ပါတယ်။
မေတ္တာ တရားဟာ သတ္တ၀ါအားလုံးအပေါ် အကျိုးလိုလားပြီး လောကကို ငြိမ်းချမ်းစေတဲ့တရားဖြစ်ပါတယ်။ မိမိရဲ့ ပတ်ဝန်းကျင်ဟာ မိမိရဲ့လောကဖြစ်ပါတယ်။ လောကအေးချမ်းရေး အတွက် မိမိပတ်ဝန်းကျင်ရှိ မိမိနဲ့သက်ဆိုင်သူတို့ကို ငြိမ်းချမ်းအောင် ဦးစွာ ဆောင်ရွက်သင့်ပါတယ်။ ထိုသူတို့ရဲ့ အကျိုးကို လိုလားသော မေတ္တာစိတ် (စိတ်ကောင်း၊ နှလုံးကောင်း) ဖြင့် ပြုဖွယ် ၀တ္တရားကို ဆောင်ရွက်ရမှာ ဖြစ်ပါတယ်။ ပြုဖွယ် ၀တ္တရားဆိုရာမှာ ပေးကမ်းခြင်း၊ စောင့်ရှောက်ကူညီခြင်း၊ ဆုံးမသွန်သင်ခြင်း၊ အရိုအသေပြုခြင်း၊ အဖေါ်သဟဲပြုခြင်း၊ အသိအမှတ်ပြုခြင်း၊ ခွင့်လွှတ်အနစ်နာခံခြင်း စတဲ့အရာတွေ အားလုံးပါဝင်ပါတယ်။
မိမိပတ်ဝန်းကျင် ငြိမ်းချမ်းရင် မိမိရဲ့လောကအေးချမ်းမှာပါဖြစ်ပါတယ်။ အဲဒီအခါ မိမိလည်း အေးချမ်းတဲ့ မေတ္တာရဲ့လွှမ်းခြုံမှုကို ခံစားနိုင်သူဖြစ်လာမှာပါ။ ဒါကြောင့် စိတ်ကောင်း၊ နှလုံးကောင်း နဲ့ မိမိပတ်ဝန်းကျင်ကို စောင့်ရှောက်ကူညီခြင်းဟာ မိမိကိုယ်ကို ငြိမ်းချမ်းခြင်းကို ဖြစ်ပေါ်စေနိုင်ပါတယ်။
မေတ္တာသည်သာ ဆင်ခြင်တုံတရားနှင့် ပြည့်ဝသည့်တစ်ခုတည်းသောအပြုအမူဖြစ်သည်။
Credit>>>
No comments:
Post a Comment