"မာ႟အာအာေသြာ့ လုိ႟မုေရ႟ဒါ႞န"

"မာ႟အာအာေသြာ့ လုိ႟မုေရ႟ဒါ႞န"
***********************
   တဲမ္းလိတ္ပသာေထ့ဗာ႞ "လိတ္ေဖ႞ေသအဟ၀္" တဖြဴ႟သြဴ ေခြသြဥ္းသ႟ယူ႞ယံ(စိတ္ကူးယဥ္)ေမြးေတာ၀္း။ ကထီ႞ ကဟိြဳန္ ကေမာ့႟ (ဗဟုသုတ) အလ႟ အေမြးအမန္႞ထြာတဲင္ တမ္းဗာ႞ဒ်ာ႞သြဴ။ ေရ႞အင္းေထ့မိုး အလင္ လာ႟လာ႟အဲဥ္ေထာ၀္း၊ ေရ႞ေထ့ဒ်ာ႞ ေထရ၀ါဒဗုဒၶသာ႞သနာ႞ ေလလဲုင္းတာ႞တြမ္႞ နီပအုိ၀္႞ ယံထင္႞ထုိ တသိြဳန္၀င္႟၊ ယံကထင္႞ထိုဗိြဳန္၀င္႟၊ ယံထင္႞ထို လိြဳ၀င္႟တာ႞ဒ်ာ႞သြဴ။

ေခြသြဥ္း ကထီ႞ ကဟိြဳန္ ကေမာ့႟ (ဗဟုသုတ)ကို မန္းခမ္းလို႟တန္၀င္႟နီ ေဒ့ါ႟ေငါ၀္းငြါတြမ္႞ လုိ႟မဥ္႟တန္ လို႟မဥ္႟ေက်ာ႞တျဖာ႟ ေဒါ့႟ေငါ၀္းတငြါန၀္ အ၀္႞ႏဲုင္းယိုသြဴ။
(၁) တျဖာ႟ေနာ၀္႟အရို႟ –  နီလို႟မန္းခမ္းယို ထာ႟အာ႞နာ႞တန္ငါ႞ အယံေတာ၀္း။
(၂) တျဖာ႟ေနာ၀္႟ အရို႟ –  နီလို႟မန္းခမ္းယို အံုအ၀္႞ ပရီ႞ပရာ႞ငါ႞ထာ႟ အယံေတာ၀္း။
(၃) တျဖာ႟ေနာ၀္႟ အရို႟ – နီလို႟မန္းခမ္းယို ကဥ္းအာအာ မဲဥ္ကိြဳ႟ေဗာ့႟ဒ်ာ႞ကံ႞ ကံ႞အခရာ႞ စဲင္းစဲင္းငါလဲ့ ေသေတာ၀္း အယံေတာ၀္း။

လို႟မန္းခမ္းကိုယို နီပအုိ၀္႞လို႟မ်ဳိ႟လဲ့ ေအာ၀္႞ပါေသာ့႟ေနေနသြဴ။ ကြပ္ပိြဳးထာ႟ တယံေတာ၀္းန၀္႟ သြံငြါသြံဆင္႞ ”ခမ္းထီလို႟တန္အြဥ္ငါ” ကေဒါ့႟ထန္႞ဗာ႞ယို အလင္တေမြးေတာ၀္း ကြပ္ပိြဳးမဥ္ထီ႞ငါ႞ ေထရ၀ါဒဗုဒၶဘာ႞သာ႞ ေလလဲုင္းထဲင္းငါငါ၊ ဘာ႞သာ႞ သာ႞သနာ႞ ေလာကုတၱရာ႞ကိစၥ ယံစြစ္႟လီတာ႞လဲ့ ေမြးေမြး၊ ပညာ႞ေရ႟၊ စီ႟ပြာ႟ေရ႟ စစြဥ္႞ ေလာကီ႞ကိစၥဖံု႞တာ႞လဲ့ ေမြးေမြး၊ ယံကထင္႞ထိုထြ႟၀င္႟၊ ယံကထင္႞ထို တသိြဳန္၀င္႟၊ ယံထင္႞ထိုလိြဳ၀င္႟တာ႞ဒ်ာ႞သြဴ။ ေဖ႞ေနးကေလလဲုင္း ကထင္႞ထိုထဲင္းတာ႞ မာ႟ဗာ႞ႏဲုင္းမဲုင္႟ရုိ႟ေနာ၀္႟ ေခြသြဥ္းေနးတြမ္႞ သက္ေသ႞သာဓက ေဖ႞ေသဗာ႞အေဟာ၀္ ႏဲုင္းယိုသြဴ။

(က) ပထမအဆင္႞ သက္ေသ႞သာဓက
(ကြတ္႟ခမ္းကြတ္႟ေထြာင္း မာ႟ေလ ဗုဒၶသာ႞သာ႞သနာ႞ ေဗြ႞သံဃာ႞စိြဳ႟ေပါ႞လြဥ္)
ထီ႞လို႔ေသစင္၊ ၪာဏ္႞တန္သဗၺညဳတ ေဗြ႞ဘုရာ႟ဗုဒၶေနာ၀္႟ ထြာထြဴဘုရာ႟တဆူ႞ လ႟စစဒါ႞ (၁)၀ါ႞အကို ေဟာ္႟တရာ႟ ေငါ၀္းနယ္ထြဥ္႞ ေအာ၀္႞နီငြါသြဴ။

(၁) စရထ ဘိကၡေ၀ စရိတံ- စစြဥ္႞ေနာ၀္႟ ေဗြ႞ဗြန္ ေဗြ႞စင္႟ ရဟန္႟သံဃာ႞ဖံု႞ေဟြး၊ အံုစြဴမိြဳန္းေတာ၀္းဒြဳမ္ တေထြာင္းခ်င္႞ တေက်ာင္႟ခ်င္႞ တဖူ႟တလီးကိုတြမ္႞ကၽြ႟မိြဳန္း နီပါ႟သြံပါ႟ (သံဃာ႞ေဆ့ငါ႞ယင္တဲင္
ထာ႟မာ႟ေျခာင္႟တိြဳ႞ေတာ၀္း) ကၽြ႟တပါ႟ငါ၊ ဗုဒၶသာ႞သနာ႞ ေဖ႞ေလလဲုင္းေနာ၀္႟ " စရထ- လယ္႞၀င္႟ ေလာ္၀င္႟လဲုင္းေဗြ႞"ယိုလဲ့တစိြဳး။

(၂) ေဒေသထ (ဘိကၡေ၀) ဓမၼာ- စစြဥ္႞ႏဲုင္းန၀္႟ လယ္႞လဲ့ တြမ္႞လယ္႞ေျခင္မိြဳန္းေတာ၀္း၊ တြမ္႞ေလာ္ေျခင္မိြဳန္းေတာ၀္း၊ ဗုဒၶသာ႞သနာ႞ ယံေလလဲုင္းေနာ၀္႟ (အံုေတ့႟မိြဳန္းေတာ၀္း၊ အံုေယန္မိြဳန္းေတာ၀္း)
ေဒေသထ- ေဟာ္႟၀င္႟ ၿခဲဳင္း၀င္႟ သြဥ္သင္၀င္႟ တရာ႟လဲုင္းေဗြ႞) ယိုလဲ့တစိြဳး၊ ကြပ္ပိြဳး ေဗြ႞ဘုရာ႟ဗုဒၶ ေငါ၀္းနယ္ထြဥ္႞န၀္႟နီငြါတဲင္ ကြတ္႟ခမ္းကြတ္႟ေထြာင္း မာ႟ေလ ဗုဒၶသာ႞သနာ႞ သံဃာ႞စိြဳ႟ ေပါ႞လြဥ္ေတြာ့႟
"စရထ တြမ္႞ ေဒေသထ" ထာ႟မာ႟နီဗာ႞ မာ႟လြ႟၀င္႟ဖံု႞သြဴ။

ေခြသြဥ္းသီး နီေဗြ႞သီး နီတကာ႞သီးဖံု႞ ခြဲက်ဳံ႞လြ၀င္႟ ဗုဒၶသာ႞သနာ႞ ထြာ၀င္႟ ႏိြဳ႕ဗုဒၶဘာ႞သာ႞ဖံု႞သြဴ။ ကြတ္႟ခမ္းကြတ္႟ေထြာင္း မာ႟ေလ ဗုဒၶသာ႞သနာ႞ ေဗြ႞သံဃာ႞စိြဳ႟ေနာ၀္႟ " ထာ႟အာ႞နာ႞မဥ္႞တန္၊ မဥ္႞အံု ပရီ႞ပရာ႞ေဗာ့႟ဒ်ာ႞ထာ႟၊ မဥ္႞ကိြဳ႟ေဗာ့႟ဒ်ာ႞ကံ႞" ေနာ၀္႟ ဗုဒၶသာ႞သနာ႞ အမ်ဳိ႟ေလလဲုင္းေမြးေတာ၀္းသြဴ။ ဗုဒၶသာ႞သနာ႞ ကေလလဲုင္းဗာ႞ ကထြာဗာ႞၀င္႟ ႏိြဳ႕ဗုဒၶဘာ႞သာ႞ယို ကြပ္ပိြဳး ကြတ္႟ခမ္းကြတ္႟ေထြာင္း မာ႟ေလ ဗုဒၶသာ႞သနာ႞ ေဗြ႞သံဃာ႞စိြဳ႟သီး "စရထတြမ္႞ ေဒေသထ"  ေက႟ဇူ႟ဒ်ာ႞ေနာ၀္႟သြဴ။

(ခ) ဒုတိယအဆင္႞သက္ေသ႞သာဓက
(ပအုိ၀္႞လိတ္လဲုင္႟စြစ္႟လီတာ႞ ဗဟို႞သံဃာ႞စိြဳ,ေပါ႞လြဥ္)
ေဗြ႞ဘုရာ႟ဗုဒၶ ထြာဘုရာ႟ ကူ႟ပရိနိဗၺာန္႞၊ မာ႟ေလ ဗုဒၶသာ႞သနာ႞ယို လ႟လဲဥ္း ညလဲဥ္း ေနင္႞နီရိန္ငတ္႟ရ်ာ႟ငတ္႟ဆီငတ္႟လိြဳသြဴ။ ညလဲဥ္း ေနင္႞ေပါင္႟တတြာေနာ၀္႟လဲ့ ကြပ္ပိြဳး ထာ႟အာ႞နာ႞တန္ငါ႞၊ အံုပရီ႞ပရာ႞ငါ႞ထာ၊ ကိြဳ႟ငါ႞ကံ႞တဲင္ ကရီးစခါ ထြာဗုဒၶဘာ႞သာ႞လဲ့ ထြာပေသာင္းပသာ႞ေဗာ့႟ဒ်ာ႞၊ "ေငါ၀္းၾသကာသငါလဲ့ ဒါ႞ေတာ၀္း၊ ေငါ၀္းထူ႞သဥ္သီ႞လငါလဲ့ ဒါ႞ေတာ၀္း၊ ေငါ၀္း၀ဲုင္႞ဘုရာ႟ငါလဲ့ ဒါ႞ေတာ၀္းလြ၀င္႟ဖံု႞"
(ေခြသြဥ္းမိြဳးဖါ၊ သက္လ႟(၈၀)လိြဳမ ကြဲသီထို႟၊ ေငါ၀္းၾသကာသ ဒါ႞ေတာ၀္းတငြါငြြါ သီထမ္၊ ေငါ၀္းထူ႞သီ႞လ ဒါ႞ေတာ၀္း တၿဖံဳ႞ၿဖံဳ႞  သီထမ္၊ ေငါ၀္း၀ဲုင္႞ဘုရာ႟ ဒါ႞ေတာ၀္းတေျခာင္႟ေျခာင္႟ သီဗြဳမ္ဗံ) အထ်႟ထ်႟ ဗုဒၶေယန္႞ငဲမု ေသတ၀္း၀င္႟ဖံု႞သြဴ။

ကြပ္ပိြဳး အခရာ႞ႏဲုင္းေနာ၀္႟တဲင္ ပအုိ၀္႞လိတ္လဲုင္႟စြစ္႟လီတာ႞ဗဟို႞သံဃာ႞စိြဳ႟ ေပါ႞လြဥ္ဗာ႞။ လဲုင္႞စူလဲုင္႞ေျပင္ မာ႟သြဳပ္ေလြ႟ထာ႟မာ႟ စရထ(ေထာင္ထြားေရ႟)တြမ္႞ ေဒေသထ (ေဟာ္႟ၿခဲဳင္းသြဥ္တန္႟)ဖံု႞ေတြာ့႟ဒါ႞လြ၀င္႟ ေငါ၀္းၾသကာသ၊ ဒါ႞လြ၀င္႟ ေငါ၀္းထူ႞သီလ၊ ဒါ႞လြ၀င္႟ ေငါ၀္း၀ဲုင္႞ဘုရာ႟၊ ေသလြ၀င္႟ ဗုဒၶေယန္႞ငဲးမုဖံု႞သြဴ။ (ေဗြ႞ဘုရာ႟ ဗုဒၶပြင္႟လြဥ္ေနာ၀္႟ လ႟လဲဥ္းေနင္႞ေပါင္႟ နီေရင္ငတ္႟ရ်ာ႟လိြဳ၊ နီပအုိ၀္႞ဒါ႞လြဥ္ၾသကာသန၀္႟ ေနင္႞ေပါင္႟သြံဆီ ေဗြေဟာ၀္ေတာ၀္းဒိြဳန္း၊ ကေသကဒါ႞ယိုလဲ့ ကြပ္ပိြဳးပအုိ၀္႞လိတ္လဲုင္႟စြစ္႟လီတာ႞ ဗဟို႞သံဃာ႞စိြဳ႟သီး  "စရထ တြမ္႞ ေဒသထ" ေက႟ဇူ႟တရာ႟ဒ်ာ႞ေနာ၀္႟သြဴ။

(ဂ) တတိယအဆင္႞ သက္ေသ႞သာဓက
ေစာက္႟တႏ်ာ႞ခမ္း (ကယားျပည္နယ္) လုိ႟ေပ႞ဖံု႞ ကေအာင္႞အာ၊ ကေအာင္႞ယို႟ အတန္႟တဆီေနာ၀္႟ ပအို၀္႞လိတ္လဲုင္႟စြစ္႟လီတာ႞ ဗဟို႞သံဃာ႞စိြဳ႟ အသြဳပ္သြဳပ္ လဲုင္႞စူလဲုင္႞ေျပင္ မာေလြ႟ ၀င္႟ထာ႟မာ႟
”စရထတြမ္႞ ေဒေသထ” ေက႟ဇူ႟တရာ႟ ပအုိ၀္႞ျခာ၊ စိြဳးခိြဳ႟ လိတ္လဲုင္႟၊ ဘာ႞သာ႞၊သာ႞သနာ႞၊ ေလလဲုင္းထင္႞ထိုလြဥ္ဗာ႞ေနာ၀္႟သြဴ။

ေခတ္ယိုခါ အထြာႏဲုင္းမဲုင္နဲးတဲင္ "မာတမဲုင္႟မဲုင္႟လဲ့ လိတ္အဂၤလိပ္မ႟၊ ေငါ၀္းအဂၤလိပ္မ႟" အထြာလြဥ္ ႏဲုင္းန၀္႟သြဴ။ လိတ္အဂၤလိပ္၊ ေငါ၀္းအဂၤလိပ္ ပါတ၀္းထြဴတ၀္း အထြာလြဥ္ ႏဲုင္းန၀္႟သြဴ။ နီသြဥ္းသီး၊
နီေဗြ႞သီး၊ နီတကာ႞သီး၊ ပိုလီ႟ဖံု႞အတာ႞ ရဲတလ႟ေတာ၀္း ေပ့႟တလ႟ေတာ၀္း (ဗိြဳန္ႏဲုင္းမြဴးလာ ထန္႞လြဥ္) လို႟မာ႟ထြာေခတ္ တိြဳ႞လြဥ္တဲင္ "လိတ္အဂၤလိပ္ ေငါ၀္းအဂၤလိပ္"ယို ေဖကဒါ႞လ်င္႞၀င္႟
"တေက်ာင္႟တပါ႟၊ တလမ္းတျဖာ႟န၀္႟ အ၀္႞လုိ႞မာေဖ႞လဲဥ္း တေခါ၀္တဖဲ့႟ တက႑သြဴ။ ခမ္းေလာင္းထီေလာင္း ဟမ္းေလာင္းတဗီ႞လြဳမ္းန၀္ လိတ္အဂၤလိပ္၊ ေငါ၀္းအဂၤလိပ္ ခင္႞လမ္းစြဥ္႞လြဥ္းလြဥ္းသြဴ။
နီပအုိ၀္႞သံဃာ႞၊ နီပအုိ၀္႞တကာ႞ဖံု႞ တေက်ာင္႟တပါ႟၊ တလမ္းတျဖာ႟ မဥ္႞ဒါ႞လ်င္႞ ၀င္႟ တဲမ္စီ႞အဂၤလိပ္၊ မဥ္႞ဒါ႞လ်င္႞၀င္႟ ေဒါ့ျဖ၀္႞ေငါ၀္းအဂၤလိပ္င၀္း၊ မဥ္႞ဒါ႞လ်င္႞၀င္႟ ထြားေဟာ္႟အဂၤလိပ္ေနာ၀္႟
အက်ဳိ,အာ တတြာမဲုင္႟၊ ေဗြ႞စင္႟မဲဥ္အြဥ္႞နယ္ သက္ေသ႞သာဓက တဗာ႞သြဴ။
ပညာ႞ေရ႟လုိ႟တန္ (ပညာေရးမွဴး)တျဖာ႟ေဒါ့႟
" နီမန္းခမ္းကို ေစာက္႟တႏ်ာ႞ခမ္းန၀္႟ ဟံ႞အဲဥ္႞လိြဳ၀င္႟ ေပ႞လိြဳ၀င္႟၊ တြက္လို႟အျဖာ႟ ေဆ့႟လိြဳ၀င္႟။
ကြဲ႞ေတြာ့႟ လုိ႟ေပ႞ဖံု႞ ေအာင္႞အာ ေအာင္႞ယို႟
အတန္႟တဆီေနာ၀္႟သြဴ။" အာထဲင္း ေဒ႞သဟံ႞နယ္႞လင္သြဴ။ ပိြဳးအေက်ာင္႟တမဲုင္,နဲးတဲင္ ေ၀ြ႟သီး ကစိန္႞ေထာင္လြဴ႟ေနာ၀္႟အလင္ေမြးတ၀္း၊ ေ၀ြ႟သီး ေစာက္႟တႏ်ာ႞ခမ္းန၀္႟ "လုိ႟ေ၀င္လို႟ေတာ္႟ဖံု႞
လြဴ႟ေမြးသြဳံ႟ေမြးစြဥ္႞ လိတ္အဂၤလိပ္၊ ေငါ၀္းအဂၤလိပ္ဒ်ာ႞သြဴ"။ န၀္႟မ႟ လိုေပ႞သြဥ္ အတန္႟တဆီ ေအာင္႞အာ ေအာင္႞ယို႟ငါ႞သြဴ – အရို႟ႏဲုင္းန၀္႟သြဴ။

ေနာ၀္႟မ႟ နီသြဥ္းသီး နီေဗြ႞သီး ပေစၥတကာ႞ဖံု႞ နီတကာ႞သီး ပိုလီ႟ဖံု႞ အတန္႟တဆီ "ေဖ႞ေနး ကေအာင္႞အာ ကေအာင္႞ယို႟" ေနာ၀္႟ လိတ္အဂၤလိပ္၊ ေငါ၀္းအဂၤလိပ္ယို အေရ႟တန္လြဥ္လဲဥ္းအေက်ာင္႟
ေစာက္႟တႏ်ာ႞ခမ္း လို႟ေပ႞ ေဖ႞လဲဥ္း အြဥ္႞နယ္လဲဥ္း သက္ေသ႞သာဓကသြဴ။  "နီပအုိ၀္႞မူ႞ေပ႞ ခုိေပ႞ဖံု႞လဲ့ ဒါ႞လ်င္႞ လိတ္အဂၤလိပ္အတဲမ္းအစီ႞၊ ဒါ႞လ်င္႞ အဂၤလိပ္အေဒါ့႟အျဖ၀္႞၊ ဒါ႞လ်င္႞ ထြားေဟာ္႟
အဂၤလိပ္မ႟" ထင္႞လြဥ္တကၠသိုလ္႞ေက်ာင္သားအာ၊ ထင္႞သြဥ္တကၠသိုလ္႞ပညာ႞သာအာမ႟ လ႟ဘြဲ႕တကၠသုိလ္သားအာ၊ လ႟ဘြဲတကၠသုိလ္႞သားအာမ႟ ထာ႟မာ႟လိြဳင္႞အာ (ထာ႟မာ႟န၀္႟ အ၀္ထာ႟လြဳပ္႟ပိြဳဟံ႞
တစိြဳးလြဳမ္႟ေမြးတ၀္း၊ထာ႟မာ႟အလင္ အ၀္႞အာမ်ဳိ႟တန္)။ ထာ႟မာ႟လိြဳင္႞အာမ႟ ရြဥ္ႏိြဳ႕အာ၊ ရြဥ္ခံ႟နြိဳ႕အာမ႟ ေျခြျခာ႞ခ်ံ႟သာ႞ဒါ႞၊ ေျခြျခာ႞ခ်ံ႟သာ႞မ႟ အဆင္႞အရန္းထိုသြဴ။

နီသြဥ္းသီး နီေဗြ႞သီး နီတကာ႞သီး တဲမ္းပိဋကတ္ျပန္႞ပအုိ၀္႞ မဥ္႞ထြဴန၀္႟ အ၀္႞လို႞သြဳပ္မာ႟ေလြ႟ပါထဲင္း  "နီပအုိ၀္႞ျခာ တေက်ာင္႟တပါ႟ တလမ္းတျဖာ႟ ယံဒါ႞လ်င္႞ဗာ႞ လိတ္အဂၤလိပ္၊ ေငါ၀္းအဂၤလိပ္ "ေနာ၀္႟
လို႞အြဥ္႞ေထြာ့ စိြဳးခိြဳထာ႟မာ႟တဗာ႞တေခါ၀္တဲင္ အ၀္႞လို႞ရဲဥ္႟ေသ႟၀င္႟သြဴ။ ယိုခါ "မာ႟လ်ားေသ႟သီြ႞ "ထြားႏဲုင္း စရထတြမ္႞ ေဒေသထအနယ္႟ေဟာ၀္ အနယ္႟ဆ႟ေနာ၀္႟တဲင္ ျခပ္ထာ႟မာ႟ပိြဳင္(စီမံကိန္း)ယို
ေအာ၀္႞လုိ႞တဲမ္းထိြဳ႕႟ေသ႟ခါ႟လဲဥ္းန၀္႟သြဴ။ မဥ္႞တဲမ္းထိြဳ႕႟ ျခပ္ထာ႟မာ႟ပိြဳင္(စီမံကိန္း)န၀္႟ အဆင္႞ဆ႟လယို ယံပါဗာ႞
၁။ အစိြဳ႟မဥ္႟
၂။ ေကာအြဥ္ငါသား
၃။ သြဥ္ဗာ႞ႏဲုင္းမဲုင္႞ သြဥ္ဗာ႞ခိန္႞မဲုင္႟
၄။ အနီ႟အရင္႟ ထိုမ္႞ႏဲုင္းမဲုင္႟ ေထတတြာမဲုင္႟
၅။ ရဲုင္႟တသိြဳးဗာ႞ႏဲုင္းမဲုင္
၆။ ေဖ႞ဆု၊ စြဲကမ္းကိုႏဲုင္းမဲုင္႟
၇။ အနယ္႟ဆ႟ အနယ္႟ယံ အလင္မဥ္အ၀္႞လဲ့ မာ႟ႏဲုင္းမဲုင္႟တဲမ္းထိြဳ႕႟ "ျခပ္ထာ႟မာ႟ပိြဳင္(စီမံကိန္း)"  ႏဲုင္းယိုတဲင္ မဥ္႞မာ႟ေလြ႟န၀္႟ ေဟာ၀္ငါ႞သြဴ။ အတန္႟တဆီ ေအာင္႞အာ ေအာင္႞ယို႟ငါ႞သြဴ။

ပိြဳးန၀္႟မ႟ နီပအို၀္႞အဆင္းအရန္း ယံထင္႞ထိုတသိြဳန္၀င္႟၊ ယံထင္႞ထုိ ဗိြဳန္၀င္႟၊ ယံထင္႞ထို လိြဳ၀င္႟ေနာ၀္႟၊ ထာ႟အာ႞နာ႞တန္ငါလဲ့ ယံေတာ၀္း၊ အံုပရီ႞ပရာ႞ငါလဲ့ ယံေတာ၀္း၊ ကိြဳ႟ငါ႞ကံ႞လဲ့ ယံေတာ၀္း၊
ေခတ္ကာလ လို႟သီးမာ႟ထြာလြဥ္၊ ကီြလြဥ္ေတာ၀္႞လြဥ္တဲင္ ထိြဳင္႞ယိုမာ႟ငါ နီပအုိ၀္႞ျခာ စြဳမ္႞ေက်ာင္႟စြဳမ္႞ပါ႟ စြဳမ္႞ျဖာ႟စြဳမ္႞လမ္းန၀္႟ (တဲမ္းျပန္႞ပိဋကတ္ပအုိ၀္႞မဥ္႞ထြဴ) ေနးတြမ္႞ ”စရထတြမ္႞ေဒေသထ”
အနယ္႟ယံ အနယ္႟ဆ႟တဲင္ ယံသြဥ္ဒါ႞ လ်င္႞ယင္း၀င္႟ လိတ္အဂၤလိပ္၊ ေငါ၀္းအဂၤလိပ္ လို႞ငါလဲဥ္းသြဴ။ အခိန္႞တိြဳ႞လြဥ္ငါ႞လဲဥ္းသြဴ။

ေခြသြဥ္းကတဲမ္း ပသာေထ့ဒါ႞ လိတ္ေဖ႞ေသအေဟာ၀္ယို မဥ္႞ထြာဒါ႞တဲင္ စိြဳးခိြဳ,ထာ႟မာ႟ စိြဳးခိြဳ,တဖူ႟ရဲဥ္႞ေနာ၀္႟ ကယိန္းေမြးေမြးသြဴ။ လုိသီးအမ်ဳိ,အေရ႟တန္႟ဒ်ာ႞ -
(၁) ဆႏၵ    -    ထာ႟မဲဥ္လ႟
(၂) စိတၱ -        သ႟ပါပါ
(၃) ၀ီရိယ –     ထာ႟ကဲုင္းထာ႟ေသာင္႞သာ
(၄) ၀ီမံသ -    ထာ႟သူ႞ေသေအာ၀္႞၊ ထာ႟ေ၀ြ႞ဖန္႞ေရာ့႟သြဴ။

ေနးတြမ္႞ "ဒါ႞လ်င္႞တဲမ္းစီ႞ အဂၤလိပ္၊ ဒါ႞လ်င္႞ေဒါ့႟ေျဖာ၀္႞ ေငါ၀္းအဂၤလိပ္၊ ဒါ႞လ်င္႞ထြာေဟာ္႟ လိတ္အဂၤလိပ္ယိုတဲင္ ေဗြာင္ေလ၀င္႟ ပအုိ၀္႞မဲ့နား၊ ပြစ္တသာ ဒင္႞သူ႞တေရ႟၀င္႟ ပအုိ၀္႞အေရာင္႞ "ဖံု႞ေနာ။
ဒါ႞နေနာ၀္႟ ဘာ႞သာ႞ေရ႟ဒါ႞န၊ လုိ႟မုေရ႟ဒါ႞န ေအာ၀္႞နီမ်ဳိ႟သြဴ။ ဘာ႞သာ႞ေရ႟ဒါ႞နေနာ၀္႟ လူ႞ေက်ာင္႟ကန္႞၊ လူ႞တရြပ္၊ လူ႞သိမ္႞တဲင္ သာ႞သနာ႞ၿခိြဳင္းၿခိဳ,၊ နီနာ႟ယိုခါေနာ၀္႟ ဘာ႞သာ႞ေရ႟ဒါ႞နဖဲ့႟တဲ့တဲ့
ပနဲယံ ပနဲက် ပနဲလူ႞လဲဥ္း၀င္႟ဖံု႞သြဴ။

လို႟မုေရ႟ဒါ႞န ကထြာဒါ႞ တသီ႞ယြဳံ၊ ေက်ာင္႟သြဥ္ေသာ့႟လိတ္(စာသင္ေက်ာင္း)၊ တဖူ႟တထာ ပရဟိတေက်ာင္႟ စုေပါင္႟၀င္႟ေထာက္ လုိ႟ယေျခာပုိဖံု႞န၀္႟ အ၀္႞ေဆ့႟ေနကေနာ၀္႟သြဴ။ ေဖေနး
လုိ႟ခမ္းလုိ႟ထီသီး သေဖာ္႟ကေဗြာင္ လုိ႟မုေရ႟ဒါ႞နန၀္႟ လုိ႞ေဟာ္႟အာအာ လုိ႞ေဒါ့႟ျခဲဳင္းနယ္ကဲုင္းကဲုင္းန၀္႟သြဴ။

ေနာ၀္႟မ႟ နီသြဥ္းသီး နီေဗြ႞သီး နီတကာ႞သီးေနာ၀္႟ အခြင္႟အေရ႟ေဟာ၀္ ေအာ၀္႞စူကိုတဲင္ ေအာ၀္႞လို႞တရန္တမာ၀င္႟၊ တကၠသိုလ္႞ေက်ာင္,၊ ေဘာ္ဒါေဆာင္ဖံု; ၊ "ဘုန္းေတာ္ႀကီးသင္ ပညာေရးေက်ာင္း"
(ေဗြ႞ဗြန္သြဥ္ ပညာ႞ေရ႟ေက်ာင္႟)
"တေ၀င္႟နယ္႞ ပရဟိတေက်ာင္႟တၿဖံဳ႞"ဖံု႞သြဴ။ ေအာ၀္႞လို႞က်ံ႞စယ္႞ထိြဳ႕႟၊ က်ံ႞စယ္႞ေအာ္လ႟လ႟ ၀င္႟သြဴ။ ေနးတြမ္႞ စီ႟ကန္႟ေအာ၀္႞ေအာ၀္႞၊ စီ႟ကန္႟မဥ္႞ကဲုင္ လုိ႟ကဲုင္၊ လုိ႟မဥ္႞ကဲုင္ က်င္႟ကဲုင္၊ က်င္႟မဥ္႞ကဲုင္
ပညာ႞ေရ႟ကဲုင္ဒါ႞တဲင္ လိုေတာ္႟ လုိ႟ေကာင္ျခာ ယံကထင္႞သြဥ္ေႏြာင္႟တကၠသိုလ္႞ပညာ႞ေနာ၀္႟ ေနးတြမ္႞စီ႟ကန္႟ အ၀္႞လို႞စြဲကမ္းကို၀င္႟ ေလြာင္႞ဗူ႞၀င္႟သြဴ။ ၀င္႟ဘာ႞သာ႞လင္ ၀င္႟သာ႞သနာ႞လင္ဖံု႞န၀္႟
"က်မ္႞ထိြဳ႕႟ေမြး က်မ္႞ေအာ္ေမြး" အဖဲ့႟ဖဲ့႟အစိြဳးစိြဳးသြဴ။ နီစိြဳးခိြဳ႟ နီတကာ႞သီးလဲ့ ပုိလီ႟ပညာ႞ေရ႟ယို အ၀္႞လို႞စြဲးကမ္းကိုလဲဥ္း ႏဲုင္းႏဲုင္းန၀္႟သြဴ။

ေထင္းထမ္႞ပရိယတ္ ေထင္းထံ႞ပဋိပတ္ ေမြးတ၀္းဒါ႞
"သာ႞သနာ႞ပ်ဳရို႟ရို႟" ေဗြ႞ပုဂၢိဳလ္႞အထ်႟ထ်႟ ပဲင္႞ေက်ာင္႟ပဲင္႞တကာ႞၊ ေဒါ့ပဲင္႞မာ႟ပဲင္႞ခြင္႟အာ ေက်ာင္႟နင္းေဗြ႞ဗြန္တြမ္႞
တာ႞၀န္႞ေအာ၀္႞လို႟တန္ဖံု႞န၀္႟အြဥ္ငါ
"ေလာကတၳစရိယ၊ ပရဟိတလဲ့ေမြးေမြး၊ ၿဖဲ့,ပညာ႞ပါ႞ရမီ႞လဲ့ ေမြးေမြး၊ ပညာ႞ဒါ႞နလဲ့ထြာထြာ" ဗုဒၶေဗြ႞ဗြန္႟တြမ္႟တာ႞ ၀ြန္႞အ၀္႞ တကာ႞လို႟တန္ဖံု႞ ခံ႞ယပ္႟ခံ႞ခဲုင္႞နမ္း
အ၀္႞လို႞အြဥ္႞မာ႟ေဖ႞လဲဥ္း  "ပအုိ၀္႞တကၠသိုလ္႞ေဘာ္ဒါေဆာင္ ပရဟိတေက်ာင္႟ပညာ႞ေရ႟ဒါ႞န"ဖုံ;သြဴ။

"သ႟မဥ္႞ေအာ၀္႞ သီြ႞မဥ္႞ေအာ၀္႞" န၀္႟
" ေခတ္ပညာ႞ဒါ႞န"ယို အ၀္႞လို႞ရဲုင္႟လဲဥ္းသြဴ။ ရဲုင္႟မ႟ တသိြဳး၊ တသိြဳမ႟ ၀င္႟ထီ႞၊ ၀င္႟ထီ႞မ႟ ၀င္႟ေသငါ႟၊ ၀င္႟ေသငါ႟မ႟ စဲင္းေလဒါ႞သြဴ။ ေနးတြမ္႞ ရြဥ္အာ႞
ေခတ္ပညာ႞ဒါနအာ႞တဲင္ ထိန္႟ရဲပ္ဟ၀္ဟ၀္ နီစိြဳးခိြဳ႟၊ နီဘာ႞သာ႞၊ နီသာ႞သနာ႞ဖံု႞ေဟာင္း ေဗြ႞ ခြန္ နင္႟••• ။

Post By@ေမာင္းမြဴးခံ႟ ဂ်ာနယ္(လိတ္လီြးလယ္႞) အမုဲင္(၁၁)ကို ကပါဒါ႞ ေဆာင္းပါးေဗြ႞  ခြန္ဆိုင္း(ထီဗိ႟)တဲမ္း "မာ႟အာအာေသြာ့ လုိ႟မုေရ႟ဒါ႞န"