တရားအားထုတ်လိုသူများမှာ ဒီတရားများကို ဖြည့်ကျင့်ရပေမည်။
သူတော်ကောင်းတရား ၇-ပါး ကျင့်ရပါမည်။
သမထကမ္မဋ္ဌာန်း ၄၀-မှ သင့်လျှော်ရာကိုလည်း ကျင့်ရပါမည်။
သတိပဋ္ဌာန် တရားတော်များကို လေ့လာ၍ ကျင့်ရပါမည်။
တရားဆိုသည်မှာ ထိုင်နေရုံနှင့် မလုံလောက်နိုင်ပါ၊
နေ့စဉ် ထိုင်နိုင်သည့်အချိန်ကား နည်းပါးလှပေသည်။
မြတ်စွာဘုရားက သွားနေစဉ်, ထိုင်နေစဉ်, ရပ်နေစဉ်, လျှောင်းနေစဉ်, တရားကို ကျင့်ရမည်ဟု ဆုံးမထားပေသည်။ ဒါကြောင့် တရားထိုင်ဆိုတာထက် ငါတရားနှင့် နေမည် တရားကိုကျင့်မည် မတရားကိုရှောင်မည်ဟု ဆုံးဖြတ်သင့်ပေသည်။
ကျောင်းသို့ ရောက်ရှိလာသော သူတော်ကောင်းများကိုတော့...
အာနာပါန ၀င်လေထွက်လေကို အားထုတ်ခိုင်းပြီးနောက် သတိပဋ္ဌာန် သုတ်တော် လာအတိုင်း ကျင့်ခိုင်းပေသည်။ မူရင်းသတိပဋ္ဌာန်သုတ်တော်ကို များများဖတ်၍ လေ့လာ နှလုံးသွင်းရပါမည်။ တရားဆိုသည်မှာကား သိနိုင်ခဲပေသည်၊ အကြိမ် များစွာ နှလုံးသွင်းမှ သဘောကြပေလိမ့်မည်။
သတိပဋ္ဌာန်ကိုတော့ ရေးမပြတော့ပါ၊ မူရင်းဆဋ္ဌမူသည်ကား အသင့်တော်ဆုံး အကောင်းဆုံး၊ သူထက်ကောင်းတာ ရှာမတွေ့တော့ပါ။ ဘုန်းကြီးကိုယ်တိုင်လည်း မူရင်း မြန်မာပြန်အတိုင်း အသံသွင်း၍ နေ့ရောညပါ နားထောင်နေသည်ကား ကြာလှပေပြီ၊ မရိုးနိုင်သော အသံဖြစ်ပေသည်။ သူတော်ကောင်းအပေါင်းတို့လည်း ကိုယ်တိုင် အသံသွင်း၍ နားထောင်ကြည့်ကြပါလေ...။
သူတော်ကောင်းတရား ၇-ပါး-
၁။ သဒ္ဓါ၊ ရတနာသုံးပါးနှင့် ကံတရားကို ယုံကြည်ခြင်း။
၂။ သတိ၊ ကုသိုလ်ကောင်းမှုတို့ကို မမေ့ခြင်း။
၃။ ဟိရီ၊ မကောင်းမှုပြုရမည်ကို ရှက်ခြင်း။
၎။ သြတ္တပ္ပ၊ မကောင်းမှုပြုရမည်ကို ကြောက်လန့်ခြင်း။
၅။ သုတ၊ အပြစ်ကင်းသော အကြားအမြင် ဗဟုသုတရှိခြင်း။
၆။ ၀ီရိယ၊ ကုသိုလ်ကောင်းမှုတို့ကို အားထုတ် ပြုလုပ်ခြင်း။
၇။ ပညာ၊ အသိ အလိမ္မာ ဉာဏ်ပညာ။
ဤဖော်ပြပါအရည်အသွေးများကို
သူတော်ကောင်းတရား ၇-ပါးဟူ၍လည်း ခေါ်ဝေါ်ကြသည်။
No comments:
Post a Comment